ພິທີເປີດຊຸດຝຶກອົບຮົມ ທິດສະດີການເມືອງ - ການປົກຄອງ ຊຸດທີ II

ໃນຕອນເຊົ້າ ຂອງ​ວັນ​ທີ 23 ຕຸລາ 2017, ສະ​ຖາ​ບັນ​ການ​ຕ່າງປະ​ເທດ, ກົມຈັດຕັ້ງ ແລະ ພະນັກງານ ກະຊວງການຕ່າງປະເທດ ຮ່ວມກັບ ສະຖາບັນການເມືອງ - ການປົກຄອງ ແຫ່ງຊາດ ​ໄດ້​ຈັດ​ພິທີ​ເປີດ ຊຸດຝຶກອົບຮົມ ທິດສະດີການເມືອງ - ການປົກຄອງ ໄລຍະສັ້ນ 45 ວັນ, ຊຸດທີ II ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ພາຍໃນ​ກະຊວງ​ການ​ຕ່າງປະ​ເທດ ​ແລະຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ຂື້ນ ຢູ່​ສູນ​ການ​ຮ່ວມ​ມື​ສາ​ກົນ ແລະ ການ​ຝຶກ​ອົບ​ຮົມ (ICTC), ຊຸດຝຶກອົບຮົມດັ່ງກ່າວ ຈະດຳເນີນໄປນັບແຕ່ວັນທີ 23 ຕຸລາ 2017 ຈົນເຖິງ 22 ທັນວາ 2017, ໂດຍມີ ຜູ້ເຂົ້າຮ່ວມທັງ​ໝົດຈໍານວນ 47 ທ່ານ, ຍິງ 13 ທ່ານ.

ໃຫ້ກຽດເປັນປະທານພິທີເປີດ​​ຄັ້ງນີ້ ມີທ່ານ ແສງເພັດ ຮຸ່ງບຸນຍວງ , ຮອງເລຂາຄະນະບໍລິຫານງານພັກ, ຮອງ ລັດຖະມົນຕີ​​ກະຊວງ​ການ​ຕ່າງປະ​ເທດ, ​ທ່ານ ຮອງສາດ​ສະ​ດາ​ຈານສະ​ໝຸດ​ຟອງສົມ​ພາ​ນິດ, ຄະ​ນະບໍລິຫານງານ​ພັກ, ຮອງຫົວ​ໜ້າສະຖາບັນການເມືອງ-ການປົກຄອງແຫ່ງຊາດ ບັນດາ​ຄູອາຈານຈາກສະຖາບັນການເມືອງ-ການປົກຄອງແຫ່ງຊາດ ແລະ ບັນດາ​ທ່ານ​ຜູ້ຕາງໜ້າຈາກກົມ​ຕ່າງໆ ພາຍໃນກະຊວງ​ການ​ຕ່າງປະ​ເທດ, ຄະນະ​ພົວພັນ​ການ​ຕ່າງປະ​ເທດ​ສູນ​ກາງ​ພັກ ແລະຜູ້​ເຂົ້າ​ຮ່ວມ​ຝຶກ​ອົບຮົມ​.

ທ່ານ ທ່ຽງ ບຸບຜາ, ຫົວໜ້າສະ​ຖາ​ບັນ​ການ​ຕ່າງປະ​ເທດໄດ້​ຂື້ນລາຍ​ງານແຜນການຝຶກອົບຮົມ ທິດສະດີ ການເມືອງ-ການປົກຄອງ ໄລຍະສັ້ນ 45 ວັນ, ຊຸດທີ II ໃຫ້ແກ່ສະມາຊິກພັກ, ພະນັກງານຫຼັກແຫຼ່ງພາຍໃນກະຊວງການ ຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ​ຊຶ່ງ​ຕະ​ຫຼອດ​ໄລ​ຍະ​ເວ​ລາ​ດັ່ງ​ກ່າວຜູ້ເຂົ້າຮ່ວມຝຶກອົບຮົມ ຈະໄດ້ຍົກລະດັບຄວາມຮູ້ພື້ນຖານທາງດ້ານທິດສະດີການເມືອງ-ການປົກຄອງ, ຄົ້ນຄ້ວາຮ່ຳຮຽນ ທິດສະດີມາກ-ເລນິນ, ແນວທາງການປ່ຽນແປງ ໃໝ່ຂອງພັກໃນແຕ່ລະໄລຍະ, ການ​ຝຶກ​ອົບ​ຮົມ​ນີ້ ແນ່​ໃສ່ເພື່ອໃຫ້ພະນັກງານນຳພາ-ຄຸ້ມຄອງ, ພະນັກງານສືບທອດ ກໍຄືສະມາຊິກພັກ, ພະນັກງານຫຼັກແຫຼ່ງ ມີວິທີການເຮັດວຽກທີ່ຖືກຕ້ອງ ແລະ ຮູ້ໝູນໃຊ້ ບັນດາບົດຮຽນດັ່ງກ່າວເຂົ້າໃນໜ້າທີ່ວຽກງານຂອງຕົນ.

​ໃນ​ພິທີ​ດັ່ງກ່າວ, ທ່ານ ແສງເພັດ ຮຸ່ງບຸນຍວງ, ປະທານ​ພິທີໄດ້​​ໃຫ້​ຄຳ​ໂອ​ວາດແລະທິດ​ຊີ້​ນຳໂດຍ​ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳ​ຄັນຂອງການຝຶກອົບຮົມເທື່ອນີ້ ແມ່ນການ​​ຜັນ​ຂະ​ຫຍາຍ​ມະ​ຕິ​ ຂອງກອງ​ປະ​ຊຸມ​ວຽກ​ງານ​ການ​ຕ່າງ​ປະ​ເທດຄັ້ງ​ທີ 13 ແລະແຜນ​ບຳ​ລຸງ-ກໍ່​ສ້າງ​ພະ​ນັກ​ງານ​ຂອງ​ກະ​ຊວງ​ການ​ຕ່າງ​ປະ​ເທດກໍ​ຄືເພື່ອ​ເຮັດ​ໃຫ້​ການ​ປະ​ຕິ​ບັດ​ວຽກ​ງານ​ພາຍ​ໃນ​ຂອງກ​ະ​ຊວງ​ການ​ຕ່າງ​ປະ​ເທດໃຫ້​ມີປະ​ສິດ​ທິ​ຜົນສູງ​ຂື້ນກວ່າ​ເກົ່າຕາມ​ຄຳ​ຂວັນ​ຂອງກອງ​ປະ​ຊຸມ​ວຽກ​ງານ​ການ​ຕ່າງປະ​ເທດຄັ້ງ​ທີ 13 ວາງ​ອອກ​ຄື: “ຍົກ​ສູງ​ຄວາມ​ສາ​ມາດ, ລັກ​ສະ​ນະ​ນຳ​ໜ້າແລະຄວາມ​ເປັນ​ເຈົ້າ​ການ​ຂອງ​ພະ​ນັກ​ງານໃນ​ຂະ​ແໜງ​ການ​ຕ່າງ​ປະ​ເທດຕໍ່​ການ​ປະ​ຕິ​ບັດ​ແນວ​ທາງ​ການ​ຕ່າງ​ປະ​ເທດ”. ພ້ອມ​ດຽວ​ກັນ​ນີ້, ກໍ​ເພື່ອ​ສ້າງ​ໃຫ້​ບັນ​ດາ​ສະ​ມາ​ຊິກພັກ, ພະ​ນັກ​ງານ​ນຳ​ພາ-ຄຸ້ມ​ຄອງມີ​ທັດ​ສະ​ນະ​ຫຼັກ​ໝັ້ນ​ຊົນ​ຊັ້ນໜັກ​ແໜ້ນ, ມີ​ຄຸນ​ສົມ​ບັດສິນ​ທຳ​ປະ​ຕິ​ວັດແລະມີ​ແນວ​ຄິດ​ອຸ່ນ​ອ່​ຽນ​ທຸ່ນ​ທ່ຽງ, ເຊື່ອ​ໝັ້ນ​ຕໍ່​ການ​ນຳ​ພາ​ຂອງ​ພັກ, ມີ​ແບບ​ແຜນ​ດຳ​ລົງ​ຊີ​ວິດ​ປອດ​ໃສແລະມີ​ວິ​ທີ​ການ​ເຮັດ​ວຽກ​ທີ່​ຖືກ​ຕ້ອງ,ນອກ​ຈາກນັ້ນ, ກໍ​ເພື່ອ​ປະ​ຕິ​ບັດ​ ແຜນ​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດຂອງ​   ກະ​ຊວງ​ການ​ຕ່າງ​ປະ​ເທດໃຫ້​ບັນ​ລຸ​ຕາມ​ຄາດ​ໝາຍ​ທີ່​ວາງ​ໄວ້.
ທ່ານ​ປະ​ທານ​ພິ​ທີຍັງ​ໄດ້ສະ​ແດງ​ຄວາມ​ຊົມ​ເຊີຍ​ຕໍ່​ຄະນະ​ຮັບຜິດຊອບ​ຊຸດ​ຮຽນກໍ​ຄື ​ສະ​ຖາ​ບັນ​ການ​ຕ່າງປະ​ເທດ, ກົມຈັດຕັ້ງ ແລະ ພະນັກງານພ້ອມ​ດ້ວຍ​ຄູ​ອາຈານທີ່ມາຈາກ ສະຖາບັນການເມືອງ-ການປົກຄອງແຫ່ງຊາດ ທີ່ໄດ້ເອົາໃຈໃສ່ໃນການກະກຽມຈັດຊຸດຝຶກອົບຮົມນີ້ຂຶ້ນ ເພື່ອເຮັດໃຫ້ສະມາຊິກພັກ, ພະນັກງານຫຼັກແຫຼ່ງ ສາມາດກຳໄດ້ພື້ນຖານທາງດ້ານທິດສະດີ, ຮູ້ໝູນໃຊ້ທິດສະດີ ເຂົ້າໃນການຊີ້ນຳ-ນຳພາ ວຽກງານຂອງຕົນພາຍໃນກະຊວງການຕ່າງປະເທດ.

ແຫຼ່ງຂ່າວ: ກະຊວງການຕ່າງປະເທດn