ປະຊາຊົນ 2 ບ້ານ ໄດ້ຮັບຄ່າຊົດເຊີຍຈາກໂຄງການລົດໄຟລາວ-ຈີນ ມູນຄ່າລວມກວ່າ 17 ຕື້ກີບ

ພິທີ​ມອບ-ຮັບ​ເງິນ​ຄ່າ​ຊົດ​ເຊີຍ​ສິ່ງ​ກີດຂວາງ​ໂຄງການ​ກໍ່ສ້າງ​ເສັ້ນທາງ​ລົດໄຟລາວ-ຈີນ ໃຫ້​ປະຊາຊົນ​ບ້ານ​ແຈ້ງ​ສະຫວ່າງ ແລະ ບ້ານ​ຫ້ວຍ​ນ້ຳ​ເຢັນ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 11 ມັງກອນ 2019 ທີ່​ຫ້ອງການ​ປົກຄອງ​ບ້ານ​ແຈ້ງ​ສະຫວ່າງ ເຊິ່ງ​ມອບ​ໂດຍ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນະຄອນຫຼວງວຽງຈັນ ຫົວໜ້າ​ຄະນະ​ໄກ່​ເກ່ຍ​ສິ່ງ​ກີດຂວາງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ນະຄອນຫຼວງວຽງຈັນ ແລະ ຮັບ​ໂດຍ​ຜູ້​ໄດ້​ຮັບ​ຜົນ​ກະທົບ ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ການ​ເບີກ​ຈ່າຍ​ຄ່າ​ຊົດ​ເຊີຍ​ສິ່ງ​ກີດຂວາງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ໄດ້​ປະຕິບັດ​ຕາມ​ປຶ້ມ​ຄູ່​ມື​ແນະນຳ​ການ​ເບີກ​ຈ່າຍ​ຄ່າ​ຊົດ​ເຊີຍ​ສິ່ງ​ກີດຂວາງ ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ຂອງ​ຄະນະ​ຄຸ້ມ​ຄອງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ກະຊວງ​ໂຍທາ​ທິ​ການ ແລະ ຂົນສົງ ສະບັບ​ເລກ​ທີ 182/ຍທຂ ລຟ ເຊິ່ງ​ເມືອງ​ນາ​ຊາຍ​ທອງ​ມີ​ເສັ້ນທາງ​ລົດໄຟ ລາວ-ຈີນ ຕັດ​ຜ່ານ​ບ້ານ​ດົງ​ຊຽງ​ດີ DK 399+300 ຫາ ບ້ານ​ນາ​ດີ ຊາຍ​ແດນ​ເມືອງ​ນາ​ຊາຍ​ທອງ DK 369+300 ໄລຍະ​ທາງ 30 ກິໂລແມັດ ຜ່ານ 23 ບ້ານ 385 ຄອບຄົວ ເນື້ອທີ່ 1,080,026 ຕາ​ແມັດ ໃນ​ນີ້ ເປັນ​ດິນ​ລັດ 25 ຕອນ ເນື້ອທີ່ 52,868 ຕາ​ແມັດ ເຮືອນ​ທີ່​ຖືກ​ຜົນ​ກະທົບ 93 ຫຼັງ ຕົ້ນໄມ້ 4,937 ຕົ້ນ (ເກັບ​ກຳ​ຂໍ້​ມູນ​ເບື້ອງ​ຕົ້ນ).

ປັດຈຸບັນ​ເມືອງ​ນາ​ຊາຍ​ທອງ ໄດ້​ມອບ​ດິນ​ເປັນ​ທາງ​ການ​ໃຫ້​ບໍລິສັດ​ເຂົ້າ​ມາ​ກໍ່ສ້າງ 28,340 ແມັດ ແລະ ບໍລິສັດ​ເຂົ້າ​ກໍ່ສ້າງ​ຕົວ​ຈິງ 29,500 ແມັດ ຍັງ 500 ແມັດ ທີ່​ຍັງ​ມີ​ເຮືອນ​ປະຊາຊົນ​ອາໄສ​ຢູ່ ສະເພາະ​ບ້ານ​ແຈ້ງ​ສະ­ຫວ່າງ​ໄດ້​ຖືກ​ແລວ​ທາງ​ລົດໄຟ ລາວ-ຈີນ ແຕ່ DK 383+140-383+480 ຍາວ 340 ແມັດ ມີ​ດິນ 20 ຕອນ ໃນ​ນີ້ ດິນ​ລັດ 1 ຕອນ ເຮືອນ 23 ຫຼັງ ລວມ​ເປັນ​ເງິນ​ທົດ​ແທນ 7,558,643,155 ກີບ. ສ່ວນ​ບ້ານ​ຫ້ວຍ​ນ້ຳ​ເຢັນ​ຖືກ​ແລວ​ທາງ​ລົດໄຟ ລາວ-ຈີນ ແຕ່ DK 381+340-383+140 ຍາວ 1,800 ແມັດ ມີ​ດິນ 45 ຕອນ ໃນ​ນີ້ ດິນ​ລັດ 1 ຕອນ ເຮືອນ 22 ຫຼັງ ໄດ້​ເບີກ​ຈ່າຍ​ໃຫ້​ປະຊາຊົນ​ຜູ້​ຖືກ​ຜົນ​ກະທົບ​ແລ້ວ 41 ຕອນ ລວມ​ເປັນ​ເງິນ 9,668,716,009 ກີບ ລວມ 2 ບ້ານ ແມ່ນ 17,277,359,164 ກີບ.