ເຂື່ອນໄຟຟ້າເຊປຽນ-ເຊນໍ້ານ້ອຍ ຈະເລີ່ມຈຳໜ່າຍໄຟຟ້າຕົ້ນປີ 2019
ພາຍຫຼັງໄດ້ລົງມືກໍ່ສ້າງໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ເມືອງປາກຊ່ອງ ແຂວງຈຳປາສັກ ແລະ ເມືອງສາມັກຄີໄຊ ແຂວງອັດຕະປື ນັບແຕ່ທ້າຍປີ 2013 ເປັນຕົ້ນມາ ປັດຈຸບັນໂຄງການດັ່ງກ່າວ ໄດ້ດຳເນີນໄປຢ່າງມີປະສິດທິຜົນ ໂດຍຄວາມຄືບໜ້າຂອງໂຄງການສາມາດປະຕິບັດໄດ້ລື່ນແຜນການທີ່ວາງໄວ້ ແລະ ຄາດວ່າຈະສຳເລັດ ແລະ ສາມາດຈຳໜ່າຍພະລັງງານໄຟຟ້າ ໃນຕົ້ນປີ 2019.
ທ່ານ ສະຫັດທອນ ພຸດທອງ ຜູ້ອຳນວຍການບໍລິສັດ ຣາຊ-ລາວ ບໍລິການ ຈຳກັດ ໄດ້ກ່າວໃນວັນທີ 20 ທັນວາ 2017 ວ່າ: ໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ເປັນໂຄງການຮ່ວມທຶນລະຫວ່າງບໍລິສັດ SK E&C (ສ ເກົາຫຼີ) ຖືຮຸ້ນ 26% ບໍລິສັດ KOWEPO (ສ ເກົາຫຼີ) ຖືຮຸ້ນ 25% ບໍລິສັດ RATCH (ປະເທດໄທ) ຖືຮຸ້ນ 25% ແລະ ລັດວິສາຫະກິດຖືຮຸ້ນລາວ (LHSE) ຖືຮຸ້ນ 24% ກຳລັງຕິດຕັ້ງ 410 ເມກາວັດ ຜະລິດພະລັງງານໄຟຟ້າໄດ້ 1.804,2 ກິກກາວັດໂມງຕໍ່ປີ ເຊິ່ງຈະຂາຍໃຫ້ການໄຟຟ້າຝ່າຍຜະລິດແຫ່ງປະເທດໄທ (EGAT) 90% ແລະ ລັດວິສາຫະກິດໄຟຟ້າລາວ (EDL) 10% ໂຄງການນີ້ມີອາຍຸສຳປະທານ 27 ປີ ມູນຄ່າໂຄງການ 1.020 ລ້ານໂດລາສະຫະລັດ ຫຼື ປະມານ 8.160 ຕື້ກີບ ເຊິ່ງເປັນໂຄງການທີ່ມີລັກສະນະການກໍ່ສ້າງແບບການຈັດສັນນ້ຳທີ່ມີປະສິດທິຜົນ ໂດຍໃຊ້ຮູບແບບການຜັນນ້ຳຈາກບ່ອນສູງລົງສູ່ບ່ອນຕ່ຳ ເຊັ່ນ: ການພັດທະນາຝາຍຫ້ວຍໝາກຈັນ ໂດຍການຂຸດທໍ່ຜັນນ້ຳໄຫຼລົງສູ່ອ່າງເກັບນ້ຳເຂື່ອນເຊປຽນ ຂຸດທໍ່ຜັນນ້ຳໄຫຼລົງສູ່ເຂື່ອນເຊນ້ຳນ້ອຍ ແລ້ວເຈາະອຸມົງຜັນນ້ຳກ່ອນຜັນນ້ຳລົງສູ່ເຮືອນຈັກຢູ່ແຂວງອັດຕະປື.
ປັດຈຸບັນ ໄດ້ສຳເລັດການກໍ່ສ້າງຝາຍຫ້ວຍໝາກຈັນ ກວ້າງ 2,5 ແມັດ ສູງ 4,6 ແມັດ ຍາວ 30 ແມັດ ພື້ນທີ່ເກັບນ້ຳ 81 ຕາກິໂລແມັດ ສຳເລັດການກໍ່ສ້າງເຂື່ອນເຊປຽນ ສູງ 84 ແມັດ ຍາວ 1.037 ແມັດ ພື້ນທີ່ອ່າງ 217 ຕາກິໂລແມັດ ສາມາດເກັບນ້ຳໄດ້ 28 ລ້ານແມັດກ້ອນ ສຳເລັດການກໍ່ສ້າງເຂື່ອນເຊນ້ຳນ້ອຍ ສູງ 73,7 ແມັດ ຍາວ 1.600 ແມັດ ພື້ນທີ່ອ່າງ 522 ຕາກິໂລແມັດ ສາມາດເກັບນ້ຳໄດ້ 1.043 ລ້ານແມັດກ້ອນ ໃນນີ້ ການກໍ່ສ້າງວຽກທົ່ວໄປຄືບໜ້າ 90% ວຽກໂຍທາຖາວອນ 95% ວຽກໂຄງສ້າງເຫຼັກໄຮໂດຣລິກ 70% ວຽກຕິດຕັ້ງເຄື່ອງຈັກໄຟຟ້າ 54% ແລະ ວຽກສາຍສົ່ງ 61% ສັງລວມແລ້ວໂຄງການມີຄວາມຄືບໜ້າ 84% ລື່ນແຜນການເລັກນ້ອຍ ແລະ ຄາດວ່າຈະສາມາດຈຳໜ່າຍໄຟຟ້າໄດ້ໃນເດືອນກຸມພາ 2019.
ທີ່ມາ: ມະຫາຊົນ
© ຈໍາປາໂພສ | www.champapost.com
_________
Post a Comment