ວັດທະນະທຳ-ສັງຄົມ ລາວ-ຈີນ ເປີດໂຕປື້ມເຫລັ້ມໃໝ່ ດື່ມນ້ຳຮ່ວມສາຍດຽວກັນ ຄວາມຮູ້ກ່ຽວກັບ ຄວາມຮ່ວມມື ແມ່ນ້ຳລ້ານຊ້າງ-ແມ່ນ້ຳຂອງ
ໃນວັນທີ 10 ພະຈິກ 2017 ທີ່ນະຄອນຫລວງວຽງຈັນ, ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ຮ່ວມກັບ ສຳນັກພິມວິທະຍຸ ແລະ ໂທລະພາບ ແຂວງຢຸນນານ ສປ ຈີນ ແລະ ບໍລິສັດ ສຳນັກພີມ ຢຸນນານກຣຸບ ສປ ຈີນ ໄດ້ຈັດງານເປີດໂຕ ປື້ມເຫລັ້ມໃໝ່ “ດື່ມນ້ຳຮ່ວມສາຍດຽວກັນ, ຄວາມຮູ້ກ່ຽວກັບ ຄວາມຮ່ວມມື ແມ່ນ້ຳລ້ານຊ້າງ-ແມ່ນ້ຳຂອງ” (ສະບັບພາສາລາວ) ໂດຍການເຂົ້າຮ່ວມ ຂອງທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ກົ່ວ ເວີ້ຍໝິິນ (Cuo Wei Min) ຮອງຫົວໜ້າຫ້ອງວ່າການ ຖະແຫລງຂ່າວຄະນະລັດຖະບານຈີນ, ມີບັນດາແຂກຝ່າຍ ລາວ ແລະ ຈີນ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ວິວັນ ຈັນທະໂຄດ ອຳນວຍການ, ບັນນາທິການໃຫຍ່ ສຳນັກພີມ ແລະ ຈຳໜ່າຍປຶ້ມແຫ່ງລັດ ແລະ ທ່ານ ຫລີເວີ້ຍ ປະທານບໍລິສັດ ສຳນັກພີມ ຢຸນນານກຣຸບ ໄດ້ຮ່ວມລົງນາມຮ່ວມມື ຈັດພີມປຶ້ມຊຸດ “ ດື່ມນ້ຳຮ່ວມສາຍດຽວກັນ, ຄວາມຮູ້ກ່ຽວກັບ ຄວາມຮ່ວມມື ແມ່ນ້ຳລ້ານຊ້າງ-ແມ່ນ້ຳຂອງ ”. ເຊິ່ງກິດຈະກຳດັ່ງກ່າວ, ຈະສາມາດພັກດັນ ຄວາມຮ່ວມມືແລກປ່ຽນ ໃນວົງການການພີມຂອງສອງປະເທດ ລາວ-ຈີນ ໃຫ້ໄດ້ຮັບຜົນສຳເລັດ ໄປດ້ວຍດີ, ທັງເປັນການສົ່ງເສີມ ຄວາມເປັນມິດຕະພາບ ແລະ ຮັບຮູ້ເຂົ້າໃຈເຊິ່ງກັນ ແລະ ກັນ ຂອງປະຊາຊົນສອງຊາດ ລາວ-ຈີນ.
ໃນໂອກາດດຽວກັນ, ທ່ານ ນາງ ບົວໄຂ ເພັງພະຈັນ ຫົວໜ້າກົມພີມຈຳໜ່າຍ, ປະທານສະມາຄົມການພີມ ແຫ່ງ ສປປ ລາວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ການຈັດພີມປຶ້ມດັ່ງກ່າວ, ແມ່ນເປັນແບບຢ່າງ ຂອງກິດຈະກຳໜຶ່ງ ທີ່ເພີ່ມພູນຄູນສ້າງ ຄວາມຮ່ວມມືຂອງບັນດາປະເທດ ໃນລຸ່ມແມ່ນ້ຳຂອງ ເວົ້າລວມ, ເວົ້າສະເພາະ ແມ່ນຄວາມຮ່ວມມື ລະຫວ່າງ ສປປ ລາວ ແລະ ສປຈີນ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.
ຂ່າວ: ສົມຫວັງ ພາບ: ໄອ່ຄຳ /ຂປລ
© ຈໍາປາໂພສ | www.champapost.com
_________
Post a Comment