Header Ads

ເດືອນເມສາ 2018 ທີ່ແຂວງຫຼວງນໍ້າທາ ມີອຸບັດຕິເຫດ 29 ຄັ້ງ ເສຍຊີວິດ 2 ຄົນ



ອີງຕາມການລາຍງານ ນສພ ຄວາມສະຫງົບ ວ່າ : ສະພາບການສັນຈອນພາຍໃນເດືອນເມສາ 2018 ທົ່ວແຂວງຫຼວງນໍ້າທາ, ສ່ວນໃຫຍ່ຍັງມີຄວາມເປັນລະບຽບ ຮຽບຮ້ອຍດີ ຜູ້ຂັບຂີ່ສ່ວນຫຼາຍພ້ອມກັນປະຕິບັດກົດລະບຽບການສັນຈອນທີ່ວາງອອກ, ຄຽງຄູ່ກັນນີ້ ການປະຕິບັດ ຂອງເຈົ້າໜ້າທີ່ ກໍໄດ້ສຸມໃສ່ວຽກງານໂຄສະນາເຜີຍແຜ່ກົດລະບຽບການສັນຈອນປະຕິບັດໜ້າທີ່ຕາມປ້ອມຕ່າງໆ ເພື່ອອໍານວຍຄວາມສະດວກສະບາຍໃຫ້ຜູ້ຂັບຂີ່.

ພັທ ລາດສະຫວ່າງ ປຼະຈິດທຳ ຫົວໜ້າພະແນກຕຳຫຼວດຈະລາຈອນ ປກສ ແຂວງຫຼວງນໍ້າທາ ໃຫ້ຮູ້ວ່າ: ເຖິງ ເຈົ້າໜ້າທີ່ຈະມີການປະຕິບັດໜ້າທີ່ປານໃດກໍຕາມ ທົ່ວແຂວງກໍຍັງມີອຸບັດຕິເຫດເກີດຂຶ້ນ ຍ້ອນວ່າແຂວງເປັນທາງ ຜ່ານໄປຫາຊາຍແດນຊາຍແດນຈີນ ແລະ ໄທ, ເຊິ່ງໃນແຕ່ລະວັນຈະມີລົດບັນທຸກ ຂົນສິນຄ້າເຂົ້າ-ອອກຜ່ານແຂວງ ເປັນຈໍານວນຫຼາຍ. ພ້ອມກັນນີ້, ເສັ້ນທາງບໍ່ສາມາດຮອງຮັບລົດຂະໜາດໃຫຍ່ໄດ້, ຄຽງຄູ່ກັນນີ້ ພໍ່-ແມ່ປະຊາຊົນ ທີ່ໃຊ້ລົດ-ໃຊ້ ຖະໜົນພາຍໃນຍັງບໍ່ທັນຮັບຮູ້ຢ່າງເລິກເຊິ່ງຕໍ່ກັບກົດລະບຽບຈະລາຈອນທີ່ວາງອອກ ແລະ ສໍາລັບຜູ້ ທຽວທາງການປະຕິບັດກົດລະບຽບຈະລາຈອນລະຫວ່າງປະເທດ ຍັງບໍ່ໄດ້ດີເທົ່າທີ່ຄວນມີການລະເມີດກົດລະບຽບ ຕ່າງໆ ເຮັດໃຫ້ທົ່ວແຂວງມີອຸບັດຕິເຫດເກີດຂຶ້ນ; ເຊິ່ງໃນເດືອນດັ່ງກ່າວມີອຸບັດຕິເຫດເກີດຂຶ້ນ ທັງໝົດ 29 ຄັ້ງ.

ໃນນັ້ນ, ມີອຸບັດຕິເຫດລົດຈັກຕຳລົດຈັກ 12 ຄັ້ງ, ລົດໃຫຍ່ຕຳລົດໃຫຍ່ 2 ຄັ້ງ, ລົດຈັກຕໍາລົດໃຫຍ່ 11 ຄັ້ງ, ລົດຈັກຕໍາລົດຖີບ 1 ຄັ້ງ, ລົດລົ້ມເອງ 1 ຄັ້ງ, ລົດຈັກຕຳຄົນຍ່າງ 1 ຄັ້ງ, ລົດໃຫຍ່ປີ້ນເອງ 1 ເລື່ອງ, ມີພາ ຫະນະເປ່ເພເລັກໜ້ອຍ 30 ຄັນ, ສົມຄວນ 16 ຄັນ, ມີຄົນໄດ້ຮັບບາດເຈັບເລັກໜ້ອຍ 25 ຄົນ, ສາຫັດ 1 ຄົນ, ສົມຄວນ 9 ຄົນ ແລະ ເສຍຊີວິດ 2 ຄົນ. ປັດຈຸບັນແກ້ໄຂຂັ້ນເຈົ້າໜ້າທີ່ 20 ເລື່ອງ, ພວມດຳເນີນ 8 ເລື່ອງ, ສົ່ງໄອ ຍະການ 1 ເລື່ອງ, ຖ້າທຽບໃສ່ເດືອນຜ່ານມາແມ່ນເພີ່ມຂຶ້ນ 17 ຄັ້ງ, ສາເຫດ ທີ່ພາໃຫ້ເກີດອຸບັດຕິເຫດແມ່ນ ຍ້ອນດື່ມສິ່ງມຶນເມົາແລ້ວຂັບຂີ່, ແລ່ນລົດໄວເກີນກຳນົດ ແລະ ແຊງບໍ່ຮັບປະກັນ.

ຫົວໜ້າພະແນກຕໍາຫຼວດຈະລາ ຈອນ ປກສ ແຂວງຫຼວງນໍ້າທາ ໃຫ້ຮູ້ຕື່ມວ່າ: ເພື່ອເຮັດໃຫ້ອຸບັດຕິເຫດໃນເດືອນ ພຶດສະພາ ຫຼຸດລົງ, ເຈົ້າໜ້າທີ່ມີ ການປະສານກັບບັນດາໂຮງຮຽນຕ່າງໆໃນທົ່ວແຂວງໂຄສະນາກົດລະບຽບ ໃນການຂັບຂີ່ພາຫະນະການໃຊ້ລົດ-ໃຊ້ ຖະໜົນໃຫ້ຖືກຕ້ອງ ແລະ ຈະໄດ້ປະສານກັບພະແນກໂຍທາແຂວງ ປັບປຸງ ບູລະນະບັນດາປ້າຍຫ້າມ, ປ້າຍເຕືອນ, ເຄື່ອງໝາຍຊີ້ບອກຊ່ອງຈະລາຈອນ ແລະ ເພີ່ມລະບົບໄຟອຳນາດຢູ່ສາມ ແຍກ, ສີ່ແຍກພາຍໃນຕົວເມືອງໃຫ້ດີ ຂຶ້ນຕື່ມ.

ພາບ-ຂ່າວ: ນສພ ຄວາມສະຫງົບ
© ຈໍາປາໂພສ |  www.champapost.com
_________


No comments

Powered by Blogger.