Header Ads

ໃຊ້ປືນຍິງເມຍ ກ່ອນຕັດສີນໃຈຍິງຕົວຕາຍຕາມເມຍ



ເກີດເຫດຜົວໃຊ້ປືນຍິງໃສ່ເມຍຈົນເສຍຊີວິດຄາທີ່ ກ່ອນຍ່າງອອກຈາກທີ່ເກີດເຫດປະມານ 50 ເເມັດ ແລ້ວໃຊ້ປືນກະບອກດຽວກັນຍິງຕົວເອງຕາຍຕາມ, ຍ້ອນຜິດຖຽງກັນຊໍາເຮື້ອມາດົນນານ; ເຫດການດັ່ງກ່າວເກີດຂຶ້ນໃນວັນທີ 21 ພຶດສະພາ 2018 ຢູ່ບ້ານຫ້ວຍມ້າ ເມືອງຊຳເໜືອ ແຂວງຫົວພັນ.



ພະແນກສືບສວນ-ສອບສວນ ປກສ ແຂວງຫົວພັນ ໃຫ້ຮູ້ວ່າ: ພາຍຫຼັງໄດ້ຮັບລາຍງານຈາກເຈົ້າໜ້າທີ່ ປກສ ກຸ່ມຫ້ວຍມ້າ ວ່າເກີດເຫດຜົວໃຊ້ປືນຄາດຕະກຳເມຍຢູ່ບ້ານຫ້ວຍມ້າ, ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະລົງສົມທົບກັບ ປກສ ເມືອງຊຳເໜືອ, ປກສ ກຸ່ມບ້ານຫ້ວຍມ້າ, ອຳນາດການປົກຄອງ ພ້ອມດ້ວຍຍາດພີ່ນ້ອງຂອງຜູ້ຖືກເຄາະຮ້າຍ ລົງກວດກາຈຸດເກີດເຫດ ໄດ້ພົບເຫັນຜູ້ເສຍຊີວິດ ຊື່ນາງ ປາຫວ່າງ ອາຍຸ 34 ປີ ປະຊາຊົນບ້ານຫ້ວຍມ້າ ນອນເສຍຊີວິດຢູ່ໃນເຮືອນ, ຖືກລູກປືນຍິງເຂົ້າທາງຫຼັງເບື້ອງຂວາ ຊອດຫົວນົມເບື້ອງຊ້າຍ. ຫຼັງຈາກນັ້ນ, ເຈົ້າໜ້າທີ່ໄດ້ກວດຄົ້ນບໍລິເວນອ້ອມຂ້າງເຮືອນດັ່ງກ່າວພົບເຫັນ ທ້າວ ໄຊຈື່ມົວ ອາຍຸ 44 ປີ (ຜົວຂອງ ນາງ ປາຫວ່າງ) ນອນເສຍຊີວິດ ຫ່າງຈາກເຮືອນປະມານ 50 ແມັດ, ມີຮອຍບາດແຜຖືກລູກປືນຍິງໃສ່ປາຍຄາງ 1 ນັດ ແລະ ເຂົ້າກາງເອິກ 2 ນັດ.


ຜ່ານການເກັບກຳຂໍ້ມູນຫຼັກຖານ, ບວກກັບຄຳໃຫ້ການຈາກອຳນາດການປົກຄອງ ແລະ ຍາດພີ່ນ້ອງຂອງຜົວ-ເມຍດັ່ງກ່າວ ຈຶ່ງຮູ້ວ່າ: ທັງສອງໄດ້ແຕ່ງງານກັນໃນປີ 2017 ເຊິ່ງເມຍເປັນແມ່ຮ້າງມີລູກແລ້ວ 2 ຄົນ. ໃນລະຫວ່າງການໃຊ້ຊີວິດຢູ່ຮ່ວມກັນໄດ້ 1 ປີ, ພວກກ່ຽວແມ່ນມີການຜິດຖຽງກັນຕະຫຼອດ ຈົນອຳນາດການປົກຄອງ ແລະ ຍາດພີ່ນ້ອງໄດ້ສຶກສາອົບຮົບ ແລະ ກ່າວເຕືອນຫຼາຍໆຄັ້ງ ແຕ່ພວກກ່ຽວກໍບໍ່ມີການປ່ຽນແປງ.

 ກ່ອນເກີດເຫດ, ໃນວັນທີ 20 ພຶດສະພາ 2018 ທັງສອງໄດ້ຜິດຖຽງກັນອີກ ເຮັດໃຫ້ ນາງ ປາຫວ່າງ ອອກຈາກເຮືອນໄປນອນຢູ່ເຮືອນລຸງຂອງຜູ້ກ່ຽວ, ເພາະຄອບຄົວຂອງລຸງໄປຢາມພີ່ນ້ອງຢູ່ຕ່າງເມືອງ. ຮອດເວລາປະມານ 3:00 ໂມງ ຂອງວັນທີ 21 ພຶດສະພາ 2018, ທ້າວ ໄຊຈື່ມົວ ໄດ້ນໍາໄປຫາເມຍຢູ່ເຮືອນລຸງ ພ້ອມທັງເອົາປືນກາບິນໄປນຳ; ພໍໄປຮອດ, ຜູ້ກ່ຽວກໍເຂົ້າໄປໃນເຮືອນ ເຫັນເມຍນອນຢູ່ ແລ້ວຍິງປືນໃສ່ ຜູ້ເປັນເມຍທັນທີ 1 ນັດ ເຮັດໃຫ້ ນາງ ປາຫວ່າງ ເສຍຊີວິດຄາທີ່. ຈາກນັ້ນ, ທ້າວ ໄຊຈື່ມົວ ໄດ້ຍ່າງອອກຈາກຈຸດເກີດເຫດປະມານ 50 ແມັດ ແລ້ວໃຊ້ປືນກະບອກດຽວກັນທີ່ຍິງເມຍນັ້ນ, ຍິງຕົວເອງ 3 ນັດ ເສຍຊີວິດຄາທີ່.

ພາບ ແລະ ຂ່າວ: ນສພ ຄວາມສະຫງົບ
© ຈໍາປາໂພສ |  www.champapost.com
_________


No comments

Powered by Blogger.