ເຈົ້າໜ້າທີ່ ປກສ ແຂວງອຸດົມໄຊ ໄດ້ກັກຕົວຜູ້ຄ້າຂາຍຢາເສບຕິດ ພ້ອມຂອງກາງຢາບ້າ ຈຳນວນ 166 ເມັດ ເຮໂຣອິນ ຈຳນວນ 01 ກ້ອນນ້ອຍ ນໍ້າໜັກ 0,3 ກຣາມ

ໃນເວລາ 18 ໂມງ 30 ນາທີ ຂອງວັນທີ 30ເມສາ 2018ຜ່ານມາ ທາງເຈົ້າໜ້າທີ່ຕຳຫຼວດປ້ອງກັນເຄື່ອນທີ່ ປກສ ແຂວງອຸດົມໄຊ ໄດ້ອອກເຄື່ອນໄຫວລາດຕະເວນ ຢູ່ລະຫວ່າງ ເສັ້ນທາງບ້ານພູຂຽວ-ບ້ານລ່ອງກໍເດື່ອ ເມືອງໄຊ ແຂວງອຸດົມໄຊ. ຕົກມາຮອດເວລາ 02 ໂມງ 00 ນາທີ ຂອງວັນທີ 01 ພຶດສະພາ 2018 ໄດ້ພົບເຫັນລົດກະບະ ຍີ່ຫໍ້ VIGO champ ສີຂາວ ໝາຍເລກທະບຽນ ກຳແພງນະຄອນ ກບ 7269 ເຊິ່ງໄດ້ແລ່ນໄປ-ມາຕາມເສັ້ນທາງສາຍດັ່ງກ່າວ ແລະ ຜິດສັງເກດ

ທາງເຈົ້າໜ້າທີ່ຈຶ່ງໄດ້ອັດລົດເພື່ອຂໍອະນຸຍາດກວດຄົ້ນ, ຜ່ານການກວດຄົ້ນລົດ ແລະ ຕົນຕົວຂອງຜູ້ຂັບຂີ່ໄດ້ພົບເຫັນເຄື່ອງຂອງກາງທີ່ຜິດກົດໝາຍເປັນຢາເສບຕິດ ປະເພດຢາບ້າ ຈຳນວນ 166 ເມັດ, ນໍ້າໜັກ 16,6 ກຣາມ ແລະ ເຮໂຣອິນ ຈຳນວນ 01 ກ້ອນນ້ອຍ ນໍ້າໜັກ 0,3 ກຣາມ ຊຸກເຊື່ອງໄວ້ຢູ່ໃນຕັບໂບລົດທີ່ຜູ່ກ່ຽວຂັບຂີ່ມານັ້ນຈາກນັ້ນທາງເຈົ້າໜ້າທີ່ໄດ້ກັກຕົວຜູ້ຂັບຂີ່ລົດຄັນ ດັ່ງກ່າວພ້ອມຂອງກາງ-ພະຫະນະເຂົ້າສຶບຖາມປະຫວັດຂອງຜູ່ກ່ຽວໃນເບື້ອງຕົ້ນຢູ່ທີ່ກອງພັນປ້ອງກັນເຄື່ອນທີ່ຈຶ່ງຮູ້ວ່າຜູ່ກ່ຽວຊື່ ທ້າວ ຄຳໄຊ ວາ ອາຍຸ 32 ປີ, ອາຊີບຫ່ວາງງານ, ຢູ່ບ້ານ ດອນແກ້ວ ເມືອງໄຊ ແຂວງອຸດົມໄຊ,ເຄື່ອງຕິດຕົວມີ ໂມງໃສ່ແຂນ ຈຳນວນ 01 ໜ່ວຍ; ໃບຂັບຂີ່ຍານພາຫະນະ 01 ໃບ; ທະບຽນພາຫະນະ ຈຳນວນ 01 ໃບ; ປື້ມຕິດຕາມການຂື້ນທະບຽນລົດ 01 ຫົວ. ຕົກມາຮອດເວລາ 11 ໂມງ 40 ນາທີ ຂອງວັນດຽວກັນຈຶ່ງໄດ້ແຈ້ງໃຫ້ ເຈົ້າໜ້າຕຳຫຼວດພະແນກທີ່ກ່ຽວຂ້ອງນຳຕົວຜູ່ກ່ຽວພ້ອມດ້ວຍເຄື່ອງຂອງກາງໄປດຳເນີນຄະດີຕາມລະບຽບກົດໝາຍຕໍ່ໄປ.

ພາບ-ຂ່າວ: ສທ ພອນສະຫວັດ ພົມມະເລດ

© ຈໍາປາໂພສ |  www.champapost.com

_________