ທ່ານ ຄໍາໄຕ ສະແດງຄວາມເປັນຫ່ວງຕໍ່ການສໍ້ລາດບັງຫຼວງຂອງສະມາຊິກພັກ ໃນການພົບປະໂອ້ລົມ ລະຫວ່າງທີ່ເດີນທາງຢ້ຽມຢາມແຂວງອັດຕະປື

ແຂວງ ອັດຕະປື : ທ່ານ ຄຳໄຕ ສີພັນດອນ ອະດີດປະທານພັກ, ປະທານປະເທດ ໄດ້ເດີນທາງຢ້ຽມຢາມແຂວງອັດຕະປື ໃນຕອນບ່າຍ ວັນທີ 11 / 1 / 2018 ໂດຍມີທ່ານ ເລັດ ໄຊຍະພອນ ເລຂາພັກແຂວງ, ເຈົ້າແຂວງອັດຕະປື ພ້ອມດ້ວຍຄະນະປະຈຳພັກແຂວງ ໃຫ້ການຕ້ອນຮັບ.

ໂອກາດດັ່ງກ່າວ ກໍ່ໄດ້ມີພິທີ ພົບປະໂອ້ລົມ ທີ່ສະໂມສອນຊັ້ນ 5 ສຳນັກງານອົງການປົກຄອງແຂວງ ໂດຍມີຄະນະພັກ, ຄະນະ ນຳຈາກພະແນກການອ້ອມຂ້າງ ຂອງແຂວງ ແລະ ເມືອງ ເຂົ້າຮ່ວມ. ໃນພິທີ ພາຍຫຼັງໄດ້ຮັບຟັງທ່ານເຈົ້າແຂວງ ລາຍງານ ສະພາບການພັດທະນາ ເສດຖະກິດ-ສັງຄົມ ຂອງແຂວງແລ້ວ ທ່ານ ຄຳໄຕ ສີພັນດອນ ໄດ້ໃຫ້ກຽດໂອ້ລົມ ປະເດັນສຳຄັນ ນອກຈາກທ່ານໄດ້ຍົກໃຫ້ເຫັນ ມູນເຊື້ອ ການນຳພາ ຂອງພັກ ແລ້ວ ທ່ານຍັງໄດ້ສະແດງຄວາມເປັນຫ່ວງ ຕໍ່ຄວາມເປັນແບບຢ່າງ ຂອງພະນັກງານ ສະມາຊິກພັກ ທີ່ນຳພາແຕ່ລະຂົງເຂດໃນປັດຈຸບັນ, ເກີດມີການສໍ້ລາດ ບັງຫຼວງ ແລະ ເຮັດເປັນຂະບວນການ, ໂອກາດດັ່ງກ່າວ ທ່ານໄດ້ ຊີ້ນຳ ແລະ ເນັ້ນໃຫ້ແຂວງອັດຕະປື ກວດກາ ແລະ ປັບປຸງຄືນ ວຽກງານພັກ ໂດຍສະເພາະ ການກໍ່ສ້າງໜ່ວຍພັກແຂງ ຮູ້ນໍາພາຮອບດ້ານ ໃນແຕ່ລະຂົງເຂດ ລວມທັງຮາກຖານບ້ານ ກວດກາ ຄວາມຮັບຜິດຊອບ ການນຳພາ ຂອງສະມາຊິກພັກ ແຕ່ລະສະຫາຍ ໃນການເຮັດສຳເລັດໜ້າທີ່ຕາມພາລະບົດບາດ ພ້ອມທັງ ປັບປຸງຄືນ ການສ້າງແຂວງ ເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານຫົວໜ່ວຍພັດທະນາ ໂດຍນຳໃຊ້ທ່າແຮງ ດ້ານຊັບພະຍາກອນມະນຸດ ແລະ ຊັບພະຍາກອນທຳມະຊາດ ເຂົ້າໃນການພັດທະນາ ໃຫ້ເກີດປະໂຫຍດສູງສຸດ ຕໍ່ປະຊາຊົນ ແລະ ປະເທດຊາດ.

ແຫຼ່ງຂ່າວ: ອັດຕະປືອອນລາຍ

© ຈໍາປາໂພສ |  www.champapost.com

_________