ກວດລົດເກັງ ພົບຢາບ້າ 6.000 ເມັດ ຢູ່ດ່ານຫຼັກ 44
ເຖິງວ່າເຈົ້າໜ້າທີ່ຕໍາຫຼວດ ເອົາໃຈໃສ່ໃນການສະກັດກັ້ນ ແລະ ປາບປາມພວກລັກລອບຊື້-ຂາຍ ແລະ ຂົນສົ່ງຢາເສບຕິດຢ່າງຈິງຈັງພຽງໃດກໍຕາມ ແຕ່ພວກເຂົາຍັງສືບຕໍ່ເຄື່ອນໄຫວໂດຍບໍ່ຢ້ານກົວຕໍ່ລະບຽບກົດໝາຍ; ຍິ່ງກວ່ານັ້ນ, ຍັງມີລັກສະນະເລິກແລບແນບນຽນກວ່າເກົ່າ ຍ້ອນຄວາມຢາກໄດ້-ຢາກມີເກີນຄວາມເປັນຈິງ ເຮັດໃຫ້ຫຼົງມົວເມົາຫາກິນໄປໃນທາງທີ່ຜິດໆ. ແຕ່ແນວໃດກໍຕາມ, ຈຸດຈົບຂອງພວກດັ່ງກ່າວສ່ວນຫຼາຍແມ່ນຖືກເຈົ້າໜ້າທີ່ຕໍາຫຼວດຈັບຕົວໄປດໍາເນີນຄະດີຕາມກົດໝາຍ.
ດັ່ງລາຍຄະດີນີ້, ເຊິ່ງເຈົ້າໜ້າຕໍາຫຼວດ ປະຈຳຈຸດກວດກາຫຼັກ 44 ເສັ້ນທາງເລກທີ 13 ໃຕ້ ເຂດບ້ານນາດ່ານເມືອງຊະນະສົມບູນ ແຂວງຈຳປາສັກ ໄດ້ສະກັດກວດຄົ້ນລົດເກັງ ສີປອນ ບໍ່ມີປ້າຍທະບຽນ ລະຫວ່າງເສັ້ນທາງຈາກແຂວງສະຫວັນນາເຂດ ມຸ່ງໜ້າຈະເຂົ້າມາເມືອງປາກເຊ ໄດ້ພົບເຫັນຢາບ້າ 3 ມັດ ເທົ່າກັບ 6.000 ເມັດ ຊຸກເຊື່ອງໄວ້ພາຍໃນລົດ ເຈົ້າໜ້າທີ່ຈຶ່ງກັກຕົວຜູ້ຂັບຂີ່ ແລະ ຜູ້ໂດຍສານມານໍາທັງໝົດ 5 ຄົນ ຍິງ 1 ຄົນ ໃນວັນທີ 17 ພະຈິກ 2017 ເພື່ອໄປສອບສວນຂະຫຍາຍຜົນທີ່ມາຂອງຢາບ້າຈໍານວນດັ່ງກ່າວ.
ເຈົ້າໜ້າທີ່ວິຊາສະເພາະ ປກສ ແຂວງຈໍາປາສັກ ໃຫ້ຮູ້ວ່າ: ຜູ້ຖືກຫາ 5 ຄົນ ຊື່ທ້າວ ນັດທະພົງ ອາຍຸ 21 ປີ, ທ້າວ ທອງໃບ ອາຍຸ 20 ປີ ທັງ 2 ຄົນ ຢູ່ບ້ານຫວ້ຍເງິນກາງ ເມືອງຈຳປາສັກ ແຂວງຈຳປາສັກ, ນາງ ສຸດາລັດ ອາຍຸ 22 ປີ ນັກສຶກສາ, ທ້າວ ໂລ້ ອາຍຸ 21 ປີ ທັງສອງຢູ່ບ້ານຈັນທະລັງສີ ເມືອງອຸທຸມພອນ ແຂວງສະຫວັນນະເຂດ ແລະ ທ້າວ ໂຮ໋ວັນເຟືອງ ອາຍຸ 40 ປີ ເປັນຄົນສັນຊາດຫວຽດນາມ, ໂດຍພວກກ່ຽວສາລະພາບວ່າ: ຢາບ້າຈໍານວນດັ່ງກ່າວ ແມ່ນຈະນໍາໄປສົ່ງໃຫ້ຜູ້ສັ່ງຊື້ຢູ່ເມືອງປາກເຊ ແຂວງຈໍາປາສັກ ແຕ່ກໍຖືກກັກຕົວໄວ້ກ່ອນ.
ຂ່າວຍັງໃຫ້ຮູ້ຕື່ມອີກວ່າ: ໃນວັນທີ 27 ພະຈິກ 2017 , ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໄດ້ສົມທົບກັບ ປກສ ເມືອງໂພນທອງ ມ້າງຄະດີຄ້າຂາຍຢາເສບຕິດຢູ່ບ້ານຝັ່ງແດງ ເມືອງໂພນທອງ ແຂວງຈຳປາສັກ ເຊິ່ງສາມາດກັກຕົວຜູ້ຖືກຫາໄດ້ 3 ຄົນ ຊື່ທ້າວ ໝີ່ງຂວັນ ( ມືດ ) ອາຍຸ 32 ປີ , ທ້າວ ອຸໄທ ( ໄທ ) ອາຍຸ 32 ແລະ ທ້າວ ອຸໄທ ( ເຈີ້ຍ ) ອາຍຸ 24 ປີ ພວກກ່ຽວທັງ 3 ຢູ່ບ້ານຝັ່ງແດງ ເມືອງໂພນທອງ ແຂວງຈຳປາສັກ ພ້ອມເຄື່ອງຂອງກາງຢາບ້າ 808 ເມັດ, ໂທລະສັບ 5 ໜວ່ຍ, ລົດຈັກ 3 ຄັນ, ປືນແກັບ 2 ກະບອກ ແລະ ລູກປືນແວັງ 6 ລູກ.
ຜ່ານການສອບສວນ ພວກກ່ຽວຮັບສາລະພາບວ່າ: ຢາບ້າຈຳນວນດັ່ງກ່າວ ແມ່ນຂອງພວກກ່ຽວແທ້ເຊິ່ງໄດ້ຮ່ວມກັນຊື້-ຂາຍຢາເສບຕິດມາແຕ່ທ້າຍປີ 2016 ຢາທີ່ນຳມາຂາຍໃນແຕ່ລະຄັ້ງ ແມ່ນຊື້ນຳຜູ້ຮ່ວມຂະບວນການນຳກັນຢູ່ເມືອງປາກເຊ ໂດຍຊື້ຄັ້ງລະ 7-8 ຖົງ ເມື່ອໄດ້ຢາບ້າມາແລ້ວກໍ່ນຳໄປຂາຍໃຫ້ໄວລຸ້ນທົ່ວໄປ. ຮອດວັນທີ 27 ພະຈິກ 2017 ເຈົ້າໜ້າທີ່ຕໍາຫຼວດເຂົ້າຈັບຕົວໄດ້ ພ້ອມທັງກວດຄົ້ນເຮືອນພົບຂອງກາງຢາບ້າຈໍານວນດັ່ງກ່າວ.
ປັດຈຸບັນ, ທັງສອງຄະດີຊື້ຊາຍຢາເສບຕິດທີ່ເຈົ້າໜ້າທີ່ແກ້ໄຂໄດ້ ແມ່ນຍັງຢູ່ໃນຂັ້ນຕອນການສືບສວນ-ສອບສວນ ເພື່ອເລັ່ງຕິດຕາມຈັບຕົວຜູ້ຮ່ວມຂະບວນການນໍາກັນ ໄປດໍາເນີນຄະດີຕາມກົດໝາຍ.
ພາບ ແລະ ຂ່າວ: ໜັງສືພີມ ຄວາມສະຫງົບ
© ຈໍາປາໂພສ | www.champapost.com
_________
Post a Comment